"Il gno lavôr al è indreçât soredut a une ricercje espressive che e rivi a rapresentâ lis tantis relazions pussibilis che sin crein tra lis personis. Cualchi volte o rapresenti la mê relazion cun ce che mi ispire o ce che mi frene, cualchi altre la esperience che lis personis a àn cul ambient esterni, ancje in sens sociâl e politic, analizant lis sôs dinamichis. Piture, videos e instalazions a son l’imprest che o dopri par trasmeti chescj messaçs in maniere che a tocjedin la interioritât di altris individuis e par stiçâ la lôr partecipazion empatiche".
"Al è un teme che mi compagne fin di cuant che o jeri piçule e che al torne tai miei pinsîrs e tes mês musichis, ven a stâi chel dal bon acet empatic dai oms. I miei lavôrs a cirin di contâ storiis di personis, di ultins e di emargjinâts, cun chê di dâur scolte, rispiet e acet midiant di chel che, di simpri, al è tra i miôr mieçs di union: la musiche."
"Tant che fotografe, o cîr di meti adun ponts di viste introspetîfs e documentaristics. La metodologjie che o dopri par creâ imagjins e sint tant lis influencis di ce che o ai intor e dal gno procès decisionâl. Il gno lavôr al esplore la vulnerabilitât, di là dal gjenar. O soi puartade a fissâ un rapuart cui miei sogjets: o soi simpri interessade al lôr pont di viste, ae lôr storie e aes lôr esperiencis."
“Mi plâs dâ une seconde pussibilitât ai ogjets; le sint come une responsabilitât eco-logjiche e eco-nomiche. Midiant de art o volarès che lis personis si fermassin e che a dedicassin un pôc di timp par un pinsîr…”
Davide Marizza al è un fantat origjinari di Turiac che, par cumò, al frecuente la sezion piture dal liceu artistic “Max Fabiani” di Gurize. Dopo un an di liceu sientific, la sô vocazion pal dissen e pe art lu sburte a cambiâ scuele e al rive cussì a jentrâ in seconde tal liceu artistic. Cheste passion e je nassude in famee, midiant di sô mari che i à simpri mostradi oparis, documentaris, mostris di cetancj artiscj, invidantlu fin di picinin, cun supuart costant, a fâ un percors so, massime te piture.
“La mê art e sta tal sielzi di interpretâ e dâ vôs a oparis di une bielece eterne. Cuant che o realizi il studi, mi concentri sul contignût dal test e mi sfuarci di cjatâ fûr lis carateristichis obietivis de linie melodiche, de struture armoniche, de forme che il compositôr al à doprât. Cuant che o ai capît lis carateristichis gramaticâls e formâls dal toc, mi misuri te ‘leture jenfri lis riis’ e o pant il gno pinsîr su la fonde dal gno gust personâl e de intuizion, mantignint simpri il rispiet massim pal test.”
O cîr di capî i miei pinsîrs e lis mês emozions metintju su la cjarte e provant a creâ piçulis contis o poesiis. O descrîf situazions diviersis di chês che o vîf ogni dì, rapresentant riflessions e sogjets diferents. Cussì la scriture e je deventade il gno “lûc sigûr” indulà lâ a cirî ripâr cuant che o ai plui dibisugne.
"O lavori su progjets che a tocjin soredut lis tematichis sociâls e ambientâls, fondint tal presint il mont passât e chel che al è daûr a definîsi in chest moment storic particolâr. La mê mission e je chê di ispirâ un mudament positîf, doprant il podê des imagjins par vê un impat significatîf. Tant che perfete millennial, o riflet tal gno lavôr la malsigurece e la transizion dai agns che o soi nassude.”
Zovin artist triestin che al ven dal mont dai grafîts. Il so stîl al è il risultât di un tentatîf di rapresentâ midiant de piture une sô ricercje continue su formis organichis che no esistin, metint dentri elements che a derivin dal grafitisim e dal design.
Tra il 2019 e il 2022 ARTESS e à lavorât cun fantatis e fantats tra i 16 e i 19 agns di cinc scuelis superiôrs di Udin (scuelis Percoto, Uccellis, Copernico, Stellini e Zanon) intai percors formatîfs “TESSERE – Teens Empowering Sociâl Skills” e “SMILE – Capaci di socialità, capaci di solidarietà”. Ae fin dal percors, fantatis e fantats a àn prodot une lôr “conte” origjinâl e creative su lis dimensions de relazion interpersonâl vuê, doprant grafiche, ilustrazion, fumet, video, fotografie. A son vignûts fûr lavôrs che a àn maraveât pal nivel ideatîf e creatîf e pe capacitât espressive: a contin il discomut relazionâl ma ancje lis pussibilitâts par frontâlu.
Dutis lis pituris e i tescj anonims a son stâts creâts e scrits dentri dal "Grup di piture intuitive" dai conseîrs volontaris di Telefonseelsorge (TS) di Bonn. I motîfs intes pituris a son espression dai lôr sintiments e no son stâts assegnâts prin de lôr creazion. Lis modalitâts espressivis e i contignûts tant diviers des pituris a mostrin che TS al è viert e disponibil par une grande varietât di emozions. Ma si viôt ben ancje ce che a àn in comun. A rifletin i sintiments di “Telefonseelsorge”, ven a stâi la “muse” di TS.