Di ducj i ricuarts di gjonde

Une persone e podarès sei ancje lontane di chê che par jê e sarès “cjase mê”, nol impuarte; ognidun al sa par se ce che i da calôr e benstâ. Chest nol è leât par fuarce ae famee naturâl che si à, ma a chê che o sielzin, fate di chês personis che o volìn che a stedin dongje di nô. Alore, chel calôr uman lu podarìn sintî ancje tal scûr, ancje lontanissims dai nestris solits ambients, ancje dome scoltant a fevelâ in maniere legre une lenghe foreste, cjalant di lontan une cjasute iluminade…