A un ciert pont i dolfins

Il confin obietîf nol esist.
Lis leçs che lu difindin dut câs a son inflessibilis e a cjapin forme in ostacui plui che concrets. Di fat, par difindi in maniere rigorose alc che nol esist, si scuen doprâ il lengaç dal podê autoritari, che ancje chel al cjape nudriment de pôre e de intolerance, pandintsi po dopo midiant de assuefazion. Al covente duncje visâsi che la dimension fisiche di chel confin e je dome la nature: aghe, tiere, e aiar; e chescj trê elements a restin imutabii di là des divisions. Al è evident il contrast tra l’aspiet materiâl de tiere e la inconsistence dal concet politic di bariere, che par chest al risulte ridicul. La materie e compromet lis regulis imponudis e lis ideologjiis, ogni storie di vite umane sorevivude al ordenament imponût e met in lûs la mediocritât dal provâ a impedî chel che no si pues impedî. Il confin politic duncje, tant che sfuarçadure di ce che al è fisic, al dopre dutis lis fuarcis par mantignî il so ordin, ma, maglât di sanc, nol vinç denant de entropie naturâl dal migrâ uman.