Cinise

Une opare nassude di un moment di crisi, de necessitât di dâ valôr a chel disorientament e dal cirî in chel une strade cognossude par che al deventi plui ricognossibil, duncje alc di podê frontâ. Lassâ une olme di alc di seren, par cuant che si vûl cirî la strade di cjase. Alore ve la cinise intes sôs sfumaduris, ricuart distudât di dutis lis seris là che al brusave il fûc e si creave la atmosfere cognossude e cirude. Cinise tant che ricuart distudât di alc che al jere vîf, e pûr propit midiant di ricuarts si pues fissâ la idee di alc che al è stât biel e che cumò al à cambiât forme, ma propit parcè che al è stât alore al pues tornâ a jessi, magari intune forme gnove.