One last farm

Maurizio, 58 agns, al lavore intune aziende metalurgjiche des 7.30 aes 16.30, ma ogni buinore aes 5, prin di lâ in fabriche, al viôt de stale de famee adun cun so pari Renzo, di 84 agns, e al torne li ancje di sere, dopo dal lavôr. La lôr no je une stale moderne, ma e conserve inmò vuê la struture di cuant che e jere stade fate sù tai agns ‘50. I mûrs a contin storiis che di altris bandis no si puedin plui lei. 

Di Lui dal 2022 Renzo al tache a vê problemis di salût che no i permetin plui di puartâ indenant la ativitât. Maurizio nol mole e si cjape sù pe schene dut il caric par che la tradizion e continuedi.

Cheste e je une storie di ustinazion e di sorevivence. O sin denant de resistence viers il timp e il progrès. Di passe 40 cjasâi che a son a Feagne e intai comuns dongje, chest al è l’unic che si conserve te tradizion, cence il supuart di grandis tecnologjiis, poiantsi su la storie rurâl. E je la testemoneance dal fat che no simpri si vûl lassâ il passât daûr di nô, stant che al rapresente ancje la storie di cui che o sin. Al è il tentatîf di fâlu vivi intun mont che al pense dome ae otimizazion, pierdint la poesie dai ritmis lents.