“Adagio” BWV1001

La racuelte cetant famose Sonate e Partite per violino solo di Johann Sebastian Bach e tache cuntun toc grandiôs e vistôs, che tal stes timp al è ancje profont e meditatîf. Un cjant malinconic al travierse ducj i regjistris dal violin cuntune improvisazion melodiose insiorade di acuardis verticâi: chescj a van daûr dal ritmi des emozions umanis che si alternin tra tension e distension. Al è un toc musicâl che dome un gjeni al podeve pensâ, cun plui nivei di leture, e che si pues interpretâlu in plui manieris diferentis, salacor ancje contraris tra di lôr. Par me al è un cjant spirituâl indreçât ae proprie anime, un viaç par cognossi il dolôr che si à, e po ancje ae consolazion; al permet di colegâsi cu la nestre dimension plui intime.